Kigali, ku wa 1 Ukwakira 2025 – Hashingiwe ku nshingano Komisiyo y’Igihugu y’Uburenganzira bwa Muntu (NCHR) ihabwa n’Itegeko Nshinga zo guteza imbere no kurengera uburenganzira bwa muntu, ku bufatanye n’umuryango Initiatives for Peace and Human Rights (iPeace), yatangije inama y’abafatanyabikorwa i Kigali, hagamijwe gusuzuma inzira zo gushyiraho amategeko y’imbere mu gihugu ku bijyanye n’Ubugenzuzi bwimbitse bw’Iyubahirizwa ry’Uburenganzira bwa Muntu n’Ibidukikije mbere yo gutangira imishinga (Mandatory Human Rights and Environmental Due Diligence, mHREDD).

Iyi nama, yatewe inkunga n’ikigo cya African Coalition for Corporate Accountability (ACCA), yahuje ibigo bya leta, imiryango itari iya Leta, Urwego rw’Abikorera (PSF), ndetse n’abafatanyabikorwa mu iterambere. Ibitekerezo byibanze ku kumenya imbaraga, intege nke n’amahirwe u Rwanda rufite mu guhuza amategeko n’imikorere y’inzego z’igihugu n’amahame mpuzamahanga y’uburenganzira bwa muntu n’ibidukikije.

Mu ijambo rye, Perezida wa Komisiyo, Hon. Madamu UMURUNGI Providence, yashimangiye ko iri huriro ari intambwe ikomeye mu ishyirwa mu bikorwa ryatangiwe rya Gahunda y'Ibikorwa ku rwego rw’Igihugu ku Bushabitsi n'Uburenganzira bwa Muntu (2025–2028) mu Rwanda. Yagize ati: “Iki ni ikimenyetso cyiza ku Rwanda mu rwego rwo gukomeza kwemeza ko ibigo bikora mu buryo buboneye, kandi byubahiriza uburenganzira bwa muntu n’ibidukikije.”

Muri iyi nama kandi, impuguke zo mu karere zitandukanye zasangije ubumenyi abitabiriye inama batandukanye. 

Abafatanyabikorwa banagize ibiganiro basuzuma uko u Rwanda ruhagaze ubu, imbogamizi zihari, ndetse n’imiterere y’amategeko y’igihugu.

Ku musozo, abitabiriye inama bemeranyije ko hakenewe gukomeza imikoranire, kubaka ubumenyi bwisumbuyeho, no gutegura intambwe zifatika mu gushyiraho umwirondoro w’itegeko ry’u Rwanda ku mHREDD. Inama yarangiye hafatwa ingamba zo gukomeza uyu muvuduko binyuze mu bufatanye n’ibikorwa bizakurikiraho bizayobora igikorwa cyo gutegura amategeko.

Uyu mushinga werekana ubuyobozi bw’u Rwanda mu guteza imbere inshingano z’ibigo no guteza imbere gahunda y’ubucuruzi n’uburenganzira bwa muntu ku rwego rw’akarere n’Isi yose.